काठमाण्डू, ३० भादबः भोटेकोशी बाइढ़मे एखनधैर तेह्र सओ ९५ गोटेक शव भेटल आ पाँच हजार १३० गोटे एखनधैर सम्पर्कविहीन अइछ।
राष्ट्रिय विपद जोखिम न्यूनीकरण तथा व्यवस्थापन प्राधिकरण सोमदिन सार्वजनिक कएल विवरणअनुसार भेटल शवमे चितवनमे ३६४, नवलपरासी पूर्वमे २३२, नवलपरासी पश्चिममे २२२, नुवाकोटमे २०२, रसुवामे १८६, गोरखामे ७७, धादिङमे ७२ आ तनहुँमे ३८ गोट शव अइछ। इलाजक क्रममे काठमाण्डूमे दू गोटेक मृत्यु भेल प्राधिकरण जनौलक अइछ।
एखनधैर भेटल शवमे १०४ गोटेक सनाखत भ गेल अइछ। बाँकी शवके पहिचानक लेल डीएनए परीक्षणलगायत प्रक्रिया आगाँ बढ़ाएल गेल अइछ।
प्राधिकरणक प्रवक्ता शान्ति महतअनुसार बाइढ़के बाद एखनधैर १३ हजार ७३७ गोटेक उद्धार कएल गेल अइछ। उद्धार कएल गेल व्यक्तिसभ विभिन्न ३३ गोट होल्डिङ सेन्टरमे राखल गेल अइछ । जाहिमे नुवाकोटमे एक हजार ४९९, रसुवामे ८२५ आ धादिङमे ९४ गोटे छैथ। डीएनए नमूनाक आधारपर सनाखत बाँकी रहल शवके पहिचान करबाक काज आगाँ बढ़ाएल गेल प्राधिकरण जनौलक अइछ।
तहिना, विभिन्न १९ गोट अस्पतालमे ३४१ गोटेक इलाज कएल गेल, जाहिमे २७८ गोटे इलाजक बाद डिस्चार्ज भ चुकल छैथ। विभिन्न सुरक्षा निकायमार्फत बेसी नौ हजार ३५८ गोटे स्वास्थ्य इलाज सेवा लेने छैथ।
प्रभावित क्षेत्रमे स्वास्थ्य मन्त्रालयमार्फत १५० गोट परामर्शदाता परिचालित कएल गेल अइछ। नेपाल प्रहरीद्वारा सञ्चालित १६६ गोट सामुदायिक जनचेतना कार्यक्रममार्फत ४५ हजार २३८ गोटेकेँ परामर्श देल गेल, प्रवक्ता महत जानकारी देलैन।
बाइढ़सँ विस्थापित तथा प्रभावित नागरिककेँ सुरक्षित स्थानमे राखैत आधारभूत आवश्यकता पूरा करबाक लेल राज्यक विभिन्न निकाय राहत तथा व्यवस्थापनक काजकेँ निरन्तरता देने अइछ। सुरक्षा निकाय, स्थानीय तह तथा विभिन्न सरकारी आ गैरसरकारी निकाय बेपत्ताके खोजी, घायलके उद्धार तथा इलाज आ राहत व्यवस्थापनमे सक्रिय छैथ।
भोटेकोशी बाइढ़सँ पैघ मानवीय तथा भौतिक क्षति भेलाक बाद सम्पर्कविहीन नागरिकक खोजीकेँ प्राथमिकता देल गेल प्राधिकरण जनौलक अइछ। बेपत्ताक खोजी तथा उद्धारक काजकेँ तीव्र बनाएल गेल प्राधिकरण जनौलक अइछ। (रासस)
